Djali i ish-zëdhënësit të UÇK-së Jakup Krasniqit, Altin Krasniqi, ka rrëfyer prapaskenat e bisedës së parë me të atin pas shpalljes së aktgjykimit nga Dhomat e Specializuara në Hagë. I ftuar në emisionin "Frontal" në T7, Krasniqi tregoi se pavarësisht vendimit të gjykatës, gjendja morale e babait të tij mbetet e lartë dhe se qëndresa e tij po shërben si pikë mbështetjeje për të gjithë familjen.

Gjatë rrëfimit të tij, Altin Krasniqi citoi mesazhin që i ati i kishte përcjellë familjes menjëherë pas dënimit në shkallë të parë: "Prej vendimit tha veç jam bërë më i fortë, kjo forca e tij është duke na dhënë forcë edhe neve si familje, kështu jemi krenar me të". Jakup Krasniqi është një nga katër ish-drejtuesit e Ushtrisë Çlirimtare të Kosovës ndaj të cilëve Gjykata Speciale shpalli vendimin më 16 shtator.