Është publikuar biseda e fundit që Nertil Buzi ka pasur me motrën e tij pak ditë përpara ngjarjes së rëndë të 24 korrikut në Roskovec, ku ai ekzekutoi ish-vjehrrin dhe ish-vjehrrën e më pas vrau veten. Në këtë komunikim, Buzi shprehte shpresën se ish-e fejuara e tij do të tërhiqte kallëzimin penal të bërë ndaj tij, ndonëse shfaqte dyshime se ajo mund të ndikohej apo pengohej nga pjesëtarët e familjes së saj.

Gjatë bisedës me të motrën, Buzi këmbëngulte se nuk kishte ushtruar kurrë dhunë ndaj ish-partneres dhe akuzonte familjarët e saj se po përpiqeshin ta dëmtonin me çdo kusht. "Duan një deklaratë nga ana e asaj… Më ka dhënë llafin ajo për të ma bërë… Po e morën vesh ata, që do bëj atë gjë, do ta detyrojnë, s’di ç’të bëjë. Nuk do ta marrin vesh ata, po e bëri do ta bëjë pa dijeninë e atyre", citohet të ketë thënë ai, duke mohuar kategorikisht akuzat për dhunë: "As e kam prekur ndonjëherë atë me dorë dhe s’kam pse e prek… Unë e di që ata atë duan, të më fundosin sa më shumë".