TIRANË — Autorieti Rrugor Shqiptar (ARRSH) ka njoftuar kufizime të përkohshme të qarkullimit në të dyja drejtimet e autostradës Tiranë–Durrës gjatë dy netëve të ardhshme, për shkak të punimeve për montimin e trarëve tërthorë në kuadër të projektit për zgjerimin e rrugës, Faza III.

Bllokimi i parë do të zbatohet në aksin Tiranë–Durrës sonte, më 21 shtator, nga ora 23:00 deri në 05:00 të mëngjesit. Gjatë këtij harku kohor, automjetet e lehta do të devijohen përmes rampës së Rinasit drejt rrugës dytësore, për t’u rikthyer më pas në superstradë. Për mjetet e rënda, devijimi i trafikut do të nisë që nga rrethrrotullimi i “Casa Italia” për të shmangur dëmtimin e infrastrukturës provizore.

Ndërkohë, në drejtimin Durrës–Tiranë, kufizimi i qarkullimit do të kryhet natën e 22 shtatorit, po nga ora 23:00 deri në 05:00. Lëvizja e automjeteve do të orientohet përmes mbikalimit Kashar–Thumanë për të vijuar në rrugën dytësore në krahun e majtë deri pas mbikalimit të Kasharit, ku do të bëhet rihyrja në autostradë.

Automjetet që udhëtojnë me destinacion Rinasin, Shkodrën apo Kosovën do të udhëzohen të shfrytëzojnë mbikalimin e autostradës Kashar–Thumanë. ARRSH u bën thirrje drejtuesve të mjeteve të respektojnë rigorozisht sinjalistikën provizore dhe udhëzimet e punonjësve të rrugës.