TORINO — Është identifikuar shtetasi shqiptar që mbeti i vrarë gjatë një tentative vjedhjeje në Baldissero D’Alba të Italisë, pasi u qëllua nga pronari i banesës ku kishte hyrë bashkë me disa persona të tjerë.

Viktima është 36-vjeçari Gjovalin Lazri, me banim në Torino, ku drejtonte një bar në periferi të qytetit dhe ishte baba i një fëmije.

Sipas të dhënave nga hetuesit vendas, ngjarja ndodhi kur Lazri, i shoqëruar nga pesë persona të tjerë, hyri në oborrin e një banese në proces rikonstruksioni. Pronari i banesës, 35-vjeçari italian Roberto Mollo, i cili ndodhej i vetëm në shtëpi, mori armën e tij pistoletë gjysmëautomatike dhe qëlloi disa herë në drejtim të grupit në errësirë.

Nga të shtënat, 36-vjeçari shqiptar mori plagë fatale që i shkaktuan vdekjen e menjëhershme. Autoritetet italiane bëjnë me dije se i ndjeri kishte precedentë të mëparshëm penalë për vepra penale kundër pronës. Policia vendase po vijon hetimet për zbardhjen e plotë të rrethanave të ngjarjes dhe identifikimin e personave të tjerë të përfshirë.