TIRANË — Gjatë punimeve të takimit të 22-të të Komitetit Parlamentar të Stabilizim-Asociimit Shqipëri–Bashkimi Evropian të zhvilluar në Tiranë, eurodeputetja Isabel Wiseler-Lima ka vënë theksin te rëndësia e ruajtjes së pavarësisë së institucioneve të reja të drejtësisë dhe zbatimi i kërkesave për heqjen e imunitetit parlamentar.

Në fjalën e saj, eurodeputetja vlerësoi ecurinë e Prokurorisë së Posaçme (SPAK), duke e cilësuar si një nga institucionet më të besuara nga qytetarët shqiptarë, ndërsa nëvizoi nevojën që reforma në drejtësi të mbetet proces i pakthyeshëm.

Gjatë ndërhyrjes së saj në takim, Isabel Wiseler-Lima u shpreh:

“Kur isha në maj këtu si vëzhguese e zgjedhjeve, ju ishit në fushatë, e tani ju shoh këtu si kolegë dhe mund të flasim si parlamentarë me njëri-tjetrin. SPAK-u është në fakt një nga institucionet të cilit shqiptarët i kanë më shumë besim dhe ka qenë i suksesshëm brenda reformës në drejtësi. Kjo është një nga format për të cilën është rënë dakord nga të dyja palët. Por megjithatë pavarësia nuk është se sigurohet menjëherë, pra kërkesat për imunitet për shembull vendosen këtu dhe çdo hetim dhe fillim i tyre do të vendosen këtu. Dhe ndërkohë anëtarë të Këshillit të Prokurorisë dhe Gjyqësorit zgjidhen nga parlamenti. Kjo nuk është një detyrë e lehtë, dhe pyetja është a do të jetë reforma në drejtësi e pakthyeshme? Unë besoj fort se përgjigjja është po.”

Përfaqësuesja e Parlamentit Evropian nëllimoi se bashkëpunimi politik dhe garantimi i autonomisë së pushtetit gjyqësor mbeten kushte thelbësore në rrugëtimin e Shqipërisë drejt anëtarësimit në Bashkimin Evropian.