TIRANË — Gjykata e Posaçme e Shkallës së Parë për Korrupsionin dhe Krimi e Organizuar (GJKKO) ka nisur aplikimin e masave administrative ndaj avokatëve që po zbatojnë bojkotin e shpallur nga Dhoma Kombëtare e Avokatisë.

Masa e gjobës u vendos gjatë seancës gjyqësore ndaj Lulzim Berishës, Emiljano Shullazit dhe të pandehurve të tjerë, lidhur me vrasjet e bujshme të vitit 2005 të Vajdin Lamës dhe Klodian Saliut, ku nga Prokuroria e Posaçme (SPAK) pritej leximi i pretencës. Avokatët mbrojtës, si të zgjedhur nga palët ashtu edhe të caktuar kryesisht, refuzuan të ulen në vendet e tyre të mbrojtjes dhe qëndruan në pjesën e rezervuar për publikun.

Për shkak të pamundësisë së zhvillimit të seancës, trupi gjykues i kryesuar nga gjyqtarja Flora Hajredinaj vendosi gjobitjen me nga 50 mijë lekë për secilin nga më shumë se 10 avokatët e pranishëm.

Vendimi i avokatëve për të mos marrë pjesë në procese lidhet me kundërshtimin e rregullores së re të brendshme të GJKKO-së, të cilën Dhoma e Avokatisë e cilëson si antikushtetuese dhe kufizuese për ushtrimin e lirë të profesionit.