KORÇË — Dy autorët e dyshuar për vrasjen e Egli Progës në Pogradec, Denis Meçe dhe Leonidha Guçe, kanë mbërritur gjatë orëve të mëngjesit të sotëm në ambientet e Gjykatës së Korçës nën masa të rrepta sigurie për nisjen e seancës gjyqësore.

Përfundimi i hetimeve nga Prokuroria çoi në dërgimin e çështjes për gjykim ndaj pesë personave. Ndaj Denis Meçes dhe Leonidha Guçes rëndon akuza e vrasjes me dashje të kryer në bashkëpunim, ndërsa të dy ndodhen nën masën e sigurisë "arrest në shtëpi". Ndërkohë, tre personat e tjerë të përfshirë në hetim — Arjan Manellari, Voltan Shkulaku dhe Andi Shkulaku — po gjykohen nën masën "detyrim paraqitje" për veprat penale të moskallëzimit të krimit dhe kryerjes së veprimeve që pengojnë zbardhjen e së vërtetës.

Në vijim të hetimeve, pozita ligjore e Leonidha Guçes pësoi ndryshim, pasi hetuesit zbuluan përfshirjen e tij të drejtpërdrejtë në dhunimin e viktimës brenda ambienteve të lokalit përpara se Egli Proga të goditej jashtë tij nga Denis Meçe.

Ngjarja e rëndë ndodhi më 10 gusht, kur pas një konflikti verbal të nisur brenda ambienteve të lokalit për motive të çastit, viktima u nxor jashtë nga autorët ku edhe u sulmua fizikisht, goditje që rezultuan fatale për jetën e tij.