Shqipëria ka ndjekur një linjë të ndryshme nga ajo e Bashkimit Europian sa i përket sigurisë së importit të mishit nga Brazili. Ndërsa BE-ja ka aplikuar bllokim të plotë edhe për mishin e derrit prej mungesës së standardeve të sigurisë, Ministria e Bujqësisë ka kufizuar vetëm importin e mishit të shpendëve dhe gjedhit prej datës 3 shtator, duke lejuar hyrjen e mishit të derrit nga stabilimente të papranuara nga Europa.

Ky vendim ka nxitur reagime nga ekspertët e sigurisë ushqimore, të cilët e konsiderojnë këtë masë gjysmake dhe pa bazë shkencore apo vlerësimi risku, meqenëse të gjitha llojet e mishit vijnë nga i njëjti shtet që përdor regjim të diferencuar nga BE-ja për përdorimin e antibiotikëve. Mishi i derrit nga Brazili parashikohet të vijojë furnizimin e industrisë së përpunimit, restoranteve dhe tregut vendas. Specialistët nëvizojnë nevojën për mbështetjen e prodhuesve drejt tregjeve alternative me lehtësi fiskale, si dhe shtimin e kontrolleve laboratorike në Pikat e Kalimit Kufitar për garantimin e sigurisë ushqimore.