Qindra qytetarë janë mbledhur mbrëmjen e kësaj të diele në sheshin “Skënderbeu” në Prishtinë, për të shprehur pakënaqësinë e tyre ndaj vendimit të fundit të Gjykatës Speciale në Hagë, e cila dënoi me një total prej 81 vitesh burgim ish-drejtuesit e Ushtrisë Çlirimtare të Kosovës.

Gjatë tubimit, protestuesit kanë shpalosur dhe valëvitur një flamur gjigand të UÇK-së, duke brohoritur thirrje në mbështetje të ish-krerëve të luftës. Manifestime analoge janë organizuar edhe nga diaspora shqiptare në Europë. Në Vjenë të Austrisë, emigrantë të shumtë u tubuan me pankarta dhe parulla të tilla si “Liria ka emër”, “Jo në emrin tim” dhe “Liri për çlirimtarët e Kosovës”.