Kancelari gjerman Friedrich Merz ka konfirmuar se do të vazhdojë të mbajë detyrën në krye të kabinetit qeveritar, me gjithë goditjen e fortë elektorale që pësoi partia e tij, CDU, në dy zgjedhje lokale të mbajtura këtë të diel.

Sipas projeksioneve të para nga transmetuesi publik ZDF, e djathta e AfD-së pritet të dalë forcë e parë në landin e Mecklenburg-Vorpommern me rreth 38% të votave, e ndjekur nga SPD me 36%, ndërsa CDU rrezikon seriozisht përfaqësimin në parlamentin rajonal. Kancelari Merz e cilësoi këtë ecuri si një "katastrofë" për demokristianët, megjithëse gjasat që AfD të marrë drejtimin e qeverisë rajonale mbeten minimale për shkak të bojkotit nga partitë e tjera politike. Paralelisht, edhe në Berlin, CDU parashikohet të humbasë pozitën e parë duke zbritur në rreth 20%, pas partisë Die Linke që kryeson me afro 26%.

Kjo humbje e dyfishtë thellon krizën politike për Merz, në veçanti pas disfatës që CDU pësoi dy javë më parë në Saksoni-Anhalt ku AfD korri rritje të dukshme. Pavarësisht presionit në rritje, kancelari u shpreh i vendosur për të çuar përpara paketën e reformave ekonomike, fiskale dhe sociale, duke nëvizuar se ndryshimet strukturore janë të domosdoshme për vendin. Rezultatet përfundimtare nga procesi i numërimit në Berlin dhe Mecklenburg-Vorpommern priten të publikohen gjatë orëve në vijim.