Shërbimet sociale dhe organizata humanitare “Missing People” në Britaninë e Madhe i kanë bërë thirrje publike qytetarëve për të ndihmuar në lokalizimin e katër të rinjve shqiptarë të kategorizuar zyrtarisht si të zhdukur. Personat e kërkuar, të cilët në momentin e humbjes së kontakteve ishin të gjithë të moshës 17-vjeçare, janë Bledar Ismailaj (i zhdukur që prej vitit 2018 nga Kings Lynn, Norfolk), Ervis Ndreca (larguar më 14 korrik 2022 nga shërbimet sociale në Hove, East Sussex), Akil Dervishi (i parë për herë të fundit më 4 maj 2022 po në Sussex) dhe Denis Haliaj (i zhdukur që prej 15 gushtit 2021 pasi u akomodua në Manchester).

Rastet e këtyre të rinjve pasqyrojnë një problematikë më të gjerë me fëmijët emigrantë të pashoqëruar në Mbretërinë e Bashkuar. Të dhënat zyrtare tregojnë se deri në 20 për qind e të miturve shqiptarë të strehuar nga këshillat lokalë anglezë kanë humbur kontaktet me autoritetet, ku vetëm në rajonin e Kentit u raportuan 39 të zhdukur nga 197 fëmijë të pranuar gjatë vitit 2022.

Autoritetet dhe mediat britanike ngrenë alarm se fëmijët e klasifikuar si të zhdukur përballen me rreziqe ekstreme të trafikut njerëzor, skllavërisë moderne dhe shfrytëzimit për punë të detyruar. Ekspertët nëvizojnë se kjo kategori është mjaft e cenueshme ndaj rrjeteve kriminale të cilat i shfrytëzojnë të miturit në ferma kanabisi, punë të paligjshme ose në rrjetet e shpërndarjes së lëndëve narkotike.