Veprimtari politik nga Skenderaj, Idriz Rrecaj, është i pari mes tre personave të identifikuar përmes analizave të ADN-së pas zhvarrimit të mbetjeve mortore nga varrezat masive të zbuluara në veri të Kosovës. Lajmi është konfirmuar zyrtarisht nga familja e tij, pasi mori përgjigjen zyrtare nga laboratori i ADN-së në Hagë, duke i dhënë fund kërkimeve dhe ankthit 27-vjeçar për fatin e tij.

Idriz Rrecaj, i dekoruar në vitin 2019 me titullin “Hero i Kosovës”, u rrëmbye dhe u zhduk me dhunë më 19 prill 1999 nga forcat serbe së bashku me 22 qytetarë të tjerë nga Skenderaj dhe Mitrovica, të njohur si “grupi i intelektualëve”. Identifikimi i tij vjen një ditë pasi kryeministri Albin Kurti njoftoi konfirmimin e tri viktimave të para nga mostrat e dërguara në Holandë nga lokacionet në Kalludër dhe Jabukë të Zubin Potokut, ku u gjetën mbetjet mortore të së paku 23 personave.

Zbulimi i këtyre varrezave masive erdhi pas një hetimi dyvjeçar për krime lufte kundër popullsisë civile, proces gjatë të cilit Prokuroria Speciale e Kosovës ka dërguar në paraburgim katër persona të dyshuar. Ndërkohë që autoritetet kosovare presin rezultatet e ADN-së për viktimat e tjera në javët në vijim, më shumë se 1,500 persona vazhdojnë të mbeten ende të zhdukur nga lufta e viteve 1998-1999.