Një zjarr ka shpërthyer ditën e sotme në fushën e grumbullimit të mbetjeve në Fushë-Krujë, ku flakët janë përhapur me shpejtësi në të gjithë sipërfaqen të favorizuara nga era e fortë. Ekspertët paraprakisht dyshojnë për zjarrvënie të qëllimshme, pasi kjo është e disata herë brenda dy muajve të fundit që ky vendgrumbullim përfshihet nga flakët.

Në terren kanë mbërritur menjëherë shërbimet zjarrfikëse së bashku me mjete të rënda ushtarake e fadroma, të cilat po punojnë për izolimin e vatrës dhe mbulimin e mbetjeve me dhe për të shuar zjarrin në nënshtresë.

Si pasojë e djegies së mbeturinave, një re e dendur tymi toksik ka mbuluar të gjithë zonën rrethuese, duke u shtrirë dhe përhapur deri në territorin e Kamzës dhe Mamurrasit. Mjetet e ndërhyrjes vijojnë punën në vendngjarje për neutralizimin e plotë të situatës.