Drejtori i Përgjithshëm i Policisë së Shtetit, Drejtues Madhor Skënder Hita, ka zhvilluar një analizë të jashtëzakonshme me strukturat e Komisariatit të Policisë Sarandë, pas ngjarjes së rëndë të ndodhur paraditen e sotme ku mbeti i vrarë 44-vjeçari Artan Myrtaj dhe u plagos një 73-vjeçar, kalimtar i rastit.

Gjatë takimit, kreu i Policisë së Shtetit kërkoi hetim të shpejtë e të thelluar për zbardhjen e ngjarjes, si dhe një skanim tërësor të situatës operative në rajon. Ai udhëzoi strukturat vendore të identifikojnë të gjitha konfliktet aktive, personat me precedentë penalë dhe kontingjentin kriminal lokal e shëtitës, duke kërkuar rezultate konkrete si për atentatin e sotëm, ashtu edhe për ngjarjet e mbetura pa autor nga vitet e kaluara.

Hita deklaroi se me përfundimin e sezonit turistik, fokusi kryesor i policisë do të jetë intensifikimi i hetimeve dhe goditja pa kompromis e grupeve të organizuara kriminale. Ai premtoi mbështetje me bazë logjistike dhe burime njerëzore përmes krijimit të strukturave të specializuara për krimet e rënda. Ndërkohë, në kuadër të veprimeve hetimore, autoritetet po ushtrojnë kontrolle nga ajri me dronë në territoret e Sarandës dhe Delvinës, ndërsa grupi hetimor nën drejtimin e Prokurorisë po vijon mbledhjen e provave materiale.