Kryeministri i Kosovës, Albin Kurti, ka deklaruar se nevojitet një koordinim i plotë dhe një strategji e përbashkët shtetërore për të reaguar ndaj vendimit të shkallës së parë të Dhomave të Specializuara ndaj katër ish-krerëve të Ushtrisë Çlirimtare të Kosovës. Në një postim në rrjetet sociale, Kurti e ka cilësuar verdiktin e Gjykatës Speciale si të padrejtë juridikisht e moralisht, si dhe të pasaktë historikisht e faktikisht.

Kreu i qeverisë u zotua se institucionet do të ofrojnë të gjithë mbështetjen e nevojshme me mjetet që kanë në dispozicion, me qëllim ndihmën ndaj ekipeve mbrojtëse gjatë procesit në shkallën e Apelit. Gjithashtu, ai nërmodhi rëndësinë e veprimeve në rrafshin diplomatik dhe bashkëpunimin e ngushtë me aleatët ndërkombëtarë për të mbrojtur luftën çlirimtare nga propaganda e Serbisë, si dhe për të dokumentuar krimet e luftës që Beogradi përpiqet të fshehë.

Reagimi i kryeministrit vjen pas vendimit të mesjavës nga Gjykata Speciale, e cila dënoi me një total prej 81 vjetësh burgim Hashim Thaçin, Kadri Veselin, Jakup Krasniqin dhe Rexhep Selimin. Ndërsa mbrojtja e të dënuarve ka paralajmëruar ankimimin e vendimit në Apel, në të gjithë Kosovën po vijojnë të organizohen protesta masive kundër këtij verdikti.