Tirana është bërë mikpritëse e takimit të 42-të të Kapitullit Europian të FBI National Academy Associates (FBINAA), ku nga data 19 deri më 23 shtator zyrtarë të lartë të FBI-së, si dhe ekspertë të sigurisë nga SHBA-ja dhe Evropa, po zhvillojnë takime me drejtues të institucioneve ligjzbatuese shqiptare. Me temën “Building International Partnerships – Combating Organized Crime for a Safer Environment”, ky aktivitet synon forcimin e bashkëpunimit ndërmjet agjencive, shkëmbimin e të dhënave operative dhe diskutimin e metodave të reja në luftën kundër krimit të organizuar.

Hapja zyrtare e punimeve të konferencës është parashikuar për datën 21 shtator, ku do të marrin pjesë drejtues të lartë, përfshirë Zëvendësdrejtorin Ndihmës të FBI-së Spencer Horn, Presidentin Ndërkombëtar të FBINAA Jim Gallagher, si dhe përfaqësues nga Policia e Shtetit, SPAK-u, BKH-ja, Prokuroria e Përgjithshme dhe EUROPOL-i.

Gjatë sesioneve pesëditore, vëmendje e veçantë do t’u kushtohet kërcënimeve teknologjike dhe formave të reja kriminale, si hetimi i rrjeteve të komunikimit të koduar dhe grupimi online ekstremist “764”. Gjithashtu, në fokus të axhendës do të jenë inteligjenca financiare, administrimi i pasurive të sekuestruara, si dhe prezantimi i rasteve me sukses të hetuara në Shqipëri nga Byroja Kombëtare e Hetimit në fushën e narkotikëve.