Detaje të reja kanë dalë në dritë nga atentati i mëngjesit të sotëm në Sarandë, ku u ekzekutua 44-vjeçari Artan Myrtaj. Nga të dhënat e fundit hetimore mësohet se përpara se të qëllohej me armë zjarri, Myrtaj ishte i ulur në një lokal pranë kryqëzimit të ish-agjencisë.

Autorët, të cilët po lëviznin përgjatë rrugës "Lefter Talo", janë afruar pranë ambientit ku ndodhej viktima. Në momentin që 44-vjeçari i ka pikasur ata, ka tentuar të largohet me vrap në drejtim të rrugës "Vangjel Pandi" për t’i shpëtuar sulmit, por autorët e kanë qëlluar dy herë me armë zjarri, duke e lënë të vdekur në mes të rrugës.

Artan Myrtaj rezulton person me precedentë penalë dhe i përfshirë në ngjarjen e rëndë të 17 korrikut 2025 në lagjen nr. 4 të Sarandës, ku u plagosën Ernest Lama dhe Gëzim Hajdaraj. Autori i atij sulmi ishte Ramadan Zoto, ndërsa Myrtaj e ndihmoi atë gjatë dhe pas krimit për t’iu shmangur drejtësisë, ngjarje kjo që pasoi një sërë episodesh hakmarrjeje në qytet.