Një shtetas 34-vjeçar nga Kosova, i shpallur në kërkim ndërkombëtar nga autoritetet e drejtësisë gjermane, është vënë në pranga nga Policia Kufitare e Morinës në bashkëpunim me Drejtorinë Vendore të Policisë Kukës. I arrestuari është identifikuar me inicialet Y. A., banues në Ferizaj, dhe u ndalua gjatë procedurave të kontrollit në hyrje të territorit të Republikës së Shqipërisë.

Sipas verifikimeve dhe shkëmbimit të informacionit me Interpol Tiranën, ndaj 34-vjeçarit ishte caktuar masa e sigurisë “Arrest në burg” nga Gjykata e Wiesbaden-it në Gjermani, nën akuzën e veprës penale “Trafikimi i lëndëve narkotike”. Aktualisht, struktura e Interpol Tiranës po vijon bashkëpunimin me homologët gjermanë për kryerjen e procedurave me qëllim ekstradimin e tij drejt Gjermanisë.