Deputeti i Partisë Demokratike, Saimir Korreshi, ka denoncuar publikisht një aktivitet të zhvilluar në ambientet e Bibliotekës brenda Muzeut të qytetit të Lushnjes, ku sipas tij është glorifikuar figura e diktatorit Enver Hoxha. Përmes një videoje të publikuar në rrjetet sociale, shihen të pranishmit duke kënduar këngë me vargje lavdëruese për ish-diktatorin dhe duke duartrokitur brenda godinës së muzeut.

Korreshi e ka cilësuar ngjarjen si një "skandal bashkiak" dhe "turp të madh", duke vënë në dukje se aktiviteti është zhvilluar në prani të kryetares së Bashkisë Lushnje, Eriselda Sefa, e cila ka mbajtur edhe një fjalë përshëndetëse. Deputeti i opozitës i ka kërkuar kryebashkiakes të dalë në një ndjesë publike përballë qytetarëve dhe të përndjekurve politikë, si dhe të marrë masa të menjëhershme për shkarkimin e zyrtarëve dhe organizatorëve që lejuan këtë aktivitet në një institucion publik.