Përfaqësues nga Kosova, Shqipëria, Maqedonia e Veriut, Mali i Zi, Lugina e Preshevës, diaspora dhe komunitetet arbëreshe janë bërë bashkë në Kalabri të Italishë, në kuadër të Forumit të Përhershëm të Turizmit Rajonal të zhvilluar më 18–20 shtator. Organizuar nga Unioni i Bashkive Shqiptare në Rajon, aktiviteti ka bërë bashkë rreth 60 delegatë me synim forcimin e bashkëpunimit kulturor, ekonomik dhe turistik përmes ruajtjes së identitetit kombëtar.

Përtej axhendës mbi promovimin e gjuhës, veshjeve tradicionale, gastronomisë dhe zakoneve arbëreshe, takimi mori edhe një dimension të fortë solidariteti politik. Në kuadër të zhvillimeve gjyqësore në Gjykatën Speciale në Hagë ndaj ish-krerëve të UÇK-së, përfaqësuesit e pranishëm përcollën njëzëri mesazhin “Liri për çlirimtarët”. Në këtë mënyrë, forumi në tokën arbëreshe shërbeu si një platformë e dyfishtë për kthimin e trashëgimisë historike në projekte konkrete zhvillimi dhe për shprehjen e mbështetjes mbarëshqiptare ndaj Kosovës.