Presidenti i SHBA-së, Donald Trump, ka njoftuar planin për krijimin e një “Force për Inteligjencën Artificiale” dhe emërimin e drejtuesit të saj në të ardhmen e afërt. Përmes një postimi në rrjetin social Truth Social, udhëheqësi amerikan e krahasoi këtë nismë me formimin e Forcës Hapësinore gjatë mandatit të tij të parë, duke e cilësuar inteligjencën artificiale si revolucionin e ardhshëm industrial që mund të përbëjë deri në 25 për qind të PBB-së së Shteteve të Bashkuara. Trump theksoi se administrata e tij nuk do ta pengojë rritjen e kësaj industrie, por do ta ndihmojë dhe mbikëqyrë atë, me synimin për të ruajtur avantazhin ndaj Kinës dhe pjesës tjetër të botës.

Përveç krijimit të strukturës së re, Trump ka propozuar edhe riemërtimin e teknologjisë, duke e cilësuar termin aktual "Inteligjencë Artificiale" si të pasaktë dhe joelegant. Përmes një sondazhi të hapur me ndjekësit e tij, ai ka sugjeruar terma alternativë si "Inteligjencë Superiore", "Inteligjencë Ekstreme" ose "Inteligjencë Supreme". Ndërkohë, sa i përket kontrollit të rreziqeve apo keqpërdorimeve të mundshme nga kjo teknologji, presidenti amerikan nënvizoi se parandalimi i shkeljeve do të bëhet përmes kuadrit ekzistues të sistemit të drejtësisë penale dhe civile.