Dinamo ka marrë një fitore të rëndësishme në stadiumin "Elbasan Arena" duke mposhtur Laçin me rezultatin 3-1, në ndeshjen e vlefshme për javën e 5-të të Abissnet Superiores. Me këtë tripiptë, skuadra e drejtuar nga trajneri Ilir Daja ngjitet në kuotën e 12 pikëve dhe renditet në vendin e dytë të klasifikimit, vetëm 1 pikë larg Teutës që kryeson kampionatin.

Pjesa e parë e takimit dhuroi emocione dhe barazim 1-1, ku Dinamo kaloi e para në avantazh në minutën e 22-të përmes një goditjeje të saktë të Lorran brenda zonës. Reagimi i kurbinasve erdhi tre minuta më vonë, kur Gamarra barazoi shifrat me një gjuajtje nga jashtë zone. Megjithatë, po ky lojtar u ndëshkua me karton të kuq në fundin e pjesës së parë pas një ndërhyrjeje si lojtar i fundit, duke e lënë Laçin me një futbollist më pak.

Në pjesën e dytë, kryeqytetasit shfrytëzuan superioritetin numerik dhe rikthyen avantazhin në minutën e 55-të me anë të Lorenco Vilës. Në minutat shtesë të ndeshjes, Flamur Ruci shënoi golin e tretë për Dinamon duke vulosur përfundimisht fitoren 3-1 dhe konsoliduar formën e mirë të skuadrës në këtë start sezoni.