Një vatër zjarri ka përfshirë pasditen e sotme një sipërfaqe me bimësi në lagjen 13 të qytetit të Durrësit, duke krijuar panik te banorët për shkak të afërsisë së flakëve dhe tymit me zonat e banuara. Sipas të dhënave paraprake, zjarri dyshohet të jetë shkaktuar nga djegia e mbeturinave prej një banori të zonës, çka solli përhapjen e shpejtë të flakëve në bimësinë përreth.

Për menaxhimin e situatës dhe izolimin e vatrës, shërbimi zjarrfikës i Durrësit dërgoi në terren dy mjete operative me tetë efektivë, të mbështetur edhe nga një autobot për furnizim me ujë. Në aksionin për kufizimin e përhapjes së zjarrit u angazhua edhe komuniteti lokal. Pas ndërhyrjes së menjëhershme të forcave zjarrfikëse, situata u vendos nën kontroll dhe aktualisht nuk raportohet për rrezik ndaj banesave pranë vatrës.