Shumica socialiste ka vendosur të përshpejtojë procedurat parlamentare për miratimin e Hartës së re Territoriale, duke parashikuar votimin e saj në seancë plenare më 8 tetor, ose më së voni deri më 15 tetor. Kalendari i punimeve nis të hënën në Konferencën e Kryetarëve dhe do të vijojë me diskutimet në Komisionin e Ligjeve. Ky afat i posaçëm vendoset për t’i lënë kohën e nevojshme përgatitjeve institucionale përpara zgjedhjeve të ardhshme vendore.

Procedura e shqyrtimit në Kuvend do të zgjasë vetëm dy javë, duke nisur më 23 shtator me prezantimin në parim të projektit. Më 28 shtator janë parashikuar seancat dëgjimore me Këshillin e Ministrave, shoqatat e bashkive dhe ekspertët e qeverisjes vendore, ndërsa shqyrtimi nen për nen në Komisionin e Ligjeve do të mbyllet më 5 tetor. Projektligji do të kalojë më pas në seancën plenare të 8 tetorit, ku Partisë Socialiste i nevojiten 84 vota për miratim përpara se dokumenti t’i kalojë Presidentit për dekretim.

Drafti i propozuar nga shumica parashikon reduktimin e numrit të bashkive nga 61 në 46, duke shkrirë 15 njësi aktuale të cilat do t’u bashkohen bashkive fqinje. Ky proces prek bashkitë Fushë-Arrëz, Klos, Rrogozhinë, Dimal, Poliçan, Patos, Divjakë, Selenicë, Maliq, Këlcyrë, Memaliaj, Libohovë, Cërrik, Belsh dhe Përrenjas, vendim i cili ka nxitur kundërshtime edhe brenda këshillave vendorë. Kjo shënon herën e dytë pas vitit 2014 që ndarja administrative miratohet pa konsensusin e opozitës, e cila propozon një hartë me 100 bashki.