Florian Hysi ka dhënë dorëheqjen nga pozicioni i drejtuesit të Agjencisë së Trashëgimisë Kulturore në Gjirokastër, pas reagimeve dhe kritikave të shumta në rrjetet sociale lidhur me mënyrën e ekspozimit të veshjeve të heroit kombëtar Çerçiz Topulli në Muzeun e Kalasë. Debati publik u nxit nga portreti i manekinit të përdorur për paraqitjen e kostumit, i cili u vlerësua si i papërshtatshëm për figurën historike. Pas reagimeve, portreti u hoq nga autoritetet dhe veshjet u vendosën mbi një manekin pa fytyrë.

Hysi i ka dorëzuar kërkesën për largim kryetarit të Bashkisë së Gjirokastrës, Flamur Golemi, duke mbajtur përgjegjësi zyrtare për menaxhimin e ekspozimit. Në deklaratën e tij, ai nërmori përgjegjësinë për veprimin dhe theksoi se vendimi i tij përfaqëson një akt respekti ndaj institucionit dhe përgjegjësisë publike.

Deklarata e Florian Hysit:

— “Ajo që u konsiderua gabim u korrigjua dhe marr të gjithë përgjegjësinë përsipër. Dorëheqja ime nuk është dorëzim nga ajo që besoj. Është një akt përgjegjësie dhe respekti për institucionin.” — Florian Hysi

— “Ne u përpoqëm, atë që u konsiderua gabim e korrigjuam dhe punën do ta lëmë të flasë vetë.” — Florian Hysi