LEZHË-MILOT, 19 shtator 2026 – Qarkullimi i mjeteve të rënda në Urën e Matit, në aksin nacional Lezhë-Milot, është kufizuar për automjetet që tejkalojnë peshën 13 tonë.

Autoriteti Rrugor Shqiptar, në bashkëpunim me Policinë Rrugore, ka vendosur barriera betoni në të dyja anët e urës, me qëllim ndalimin e kalimit të mjeteve që tejkalojnë tonazhin e lejuar.

Masa është marrë pas ndërhyrjes emergjente të kryer disa muaj më parë për përforcimin e themeleve të urës. Sipas autoriteteve, pavarësisht sinjalistikës së vendosur, monitorimet në terren kanë evidentuar raste të përsëritura të shkeljes së kufizimit nga automjetet e rënda.

Nga ana tjetër, disa përdorues të urës kanë ngritur shqetësime lidhur me gjendjen e strukturës dhe cilësinë e ndërhyrjes së kryer.

Autoriteti Rrugor Shqiptar ka sqaruar se kufizimi i qarkullimit nuk lidhet me ndonjë cedim apo dëmtim të urës, por është një masë parandaluese që synon mbrojtjen e ndërhyrjes së kryer në themele dhe garantimin e qëndrueshmërisë së strukturës në afatgjatë.

Ura e Matit ka një gjatësi prej rreth 844 metrash. Për rikonstruksionin dhe përforcimin e saj është akorduar një fond emergjent prej 107 milionë lekësh, ndërsa punimet kanë zgjatur rreth tetë muaj.

Autoritetet u bëjnë thirrje drejtuesve të mjeteve të respektojnë kufizimin dhe sinjalistikën e vendosur në zonë.