ROMA — Autoritetet italiane kanë vënë në pranga një 29-vjeçar me origjinë shqiptare në zonën e Guidonias, pasi gjatë një aksioni antidrogë u sekuestrua një sasi prej mbi 414 kilogramësh hashash, e cila kapte vlerën e më shumë se 4 milionë eurove në tregun me pakicë.

Ndërhyrja e policisë u krye në momentin kur i riu po tentonte të ngarkonte në bagazhin e automjetit të tij disa valixhe, brenda të cilave u gjetën fillimisht rreth 98 kilogramë lëndë narkotike.

Gjatë kontrollit fizik, agjentët i sekuestruan të arrestuarit një tufë çelësash që shërbyen për zbulimin e disa ambienteve të përshtatura si depo në Guidonia dhe Romë. Në njërin prej këtyre ambienteve, sasia më e madhe e drogës ruhej brenda frigoriferëve të modifikuar, ndërsa në një garazh u sekuestruan materiale paketimi për dozim si dhe shënime me të dhëna mbi sasinë e lëndës narkotike.

I riu shqiptar akuzohet për posedim dhe trafikim të lëndëve narkotike, ndërsa gjykata italiane ka konfirmuar masën e sigurisë "arrest në burg" për të.