Presidenti i Shteteve të Bashkuara, Donald Trump, ka njoftuar vendimin për t’u hequr menjëherë aksesin në Shtëpinë e Bardhë rrjeteve mediatike CNN, MS NOW dhe gazetës Politico. Vendimi u bë i ditur përmes një postimi në platformën e tij Truth Social, ku kreu i shtëpisë presidenciale i akuzoi këto media për përhapje të vazhdueshme të lajmeve të rreme dhe dezinformatave lidhur me administratën e tij.

Në deklaratën e tij, Trump argumentoi se organizatave mediatike nuk duhet t’u lejohet të transmetojnë apo publikojnë pretendime të pavërteta kur mbulojnë punën e presidentit dhe të shtetit amerikan. Krahas kritikave për mbulimin mediatik, ai shnjestroi veçanërisht Politico-n, duke e akuzuar për marrjen e 8 milionë dollarëve nga qeveria gjatë administratës së mëparshme, çka ai e cilësoi si akt korruptiv.

Shtëpia e Bardhë nuk ka dhënë ende sqarime teknike mbi mënyrën se si do të zbatohet ky kufizim dhe nëse ai përfshin revokimin e plotë të kredencialeve të gazetarëve apo vetëm pjesëmarrjen në ngjarje të caktuara. Ndërkohë, Trump paralajmëroi se lista e mediave të përjashtuara mund të zgjerohet me subjekte të tjera në vijim.