Deputeti i Partisë Socialiste, Erion Braçe, ka deklaruar se brenda grupit parlamentar mazhoritar nuk është zhvilluar ende një diskutim i plotë lidhur me Reformën e Re Territoriale. Në një intervistë televizive, Braçe theksoi se për ndarjen e re të kufijve është informuar përmes medieve, ndërsa kërkoi që procesi të përfshijë përvojën e gjithë trupës së deputetëve dhe jo vetëm të drejtuesve politikë të qarqeve.

Sipas Braçes, debati publik dhe politik po fokusohet gabimisht te shkrirja e njësive vendore, në vend që vëmendja të përqendrohet te decentralizimi i kompetencave dhe menaxhimi i fondeve kombëtare e evropiane. Ai kërkoi që pushteti qendror t’i kalojë më shumë funksione pushtetit vendor, përfshirë menaxhimin e arsimit, ndërsa bashkitë t’i delegojnë ato te njësitë administrative.

Deklaratat kryesore të Erion Braçes:

— “Reforma Territoriale mund të jetë diskutuar në ato takime që kryeministri ka bërë me drejtuesit politikë të qarqeve… Me deputetët jo. Unë e kam marrë vesh ndarjen e kufijve nga media, por ama që të jetë bërë një diskutim i plotë për reformën ende nuk është bërë. Dhe natyrisht kjo është jetike për t’u ndarë me ne.” — Erion Braçe

— “Harta e re territoriale është impostuar gabim e gjitha. Sepse çdo gjë është impostuar ‘do shkrihet kjo, do shkrihet ajo’. Thelbi i gjithë kësaj reforme janë kompetencat… Duhet që qeveria qendrore të lëshojë masivisht pushtet tek pushteti vendor.” — Erion Braçe

— “Qeverisja vendore nuk duhet të përqëndrojë pushtetin tek i pari i atij institucioni që është bashki nesër, akoma dhe më e madhe. Por, duhet ta delegojë tek njësitë administrative dhe deri tek kryeplaku.” — Erion Braçe