Viktimë e aksidentit tragjik të mëngjesit të së premtes në San Donà di Piave, pranë Venedikut, është identifikuar 42-vjeçarja nga Durrësi, Lavdije Istrefi, nënë e tre fëmijëve. E ndjera humbi jetën pasi u përplas nga një mjet për grumbullimin e mbetjeve ndërsa po shoqëronte vajzën e saj 9-vjeçare për në shkollën fillore "Marco Polo".

Aksidenti ndodhi pak para orës 08:00 në kryqëzimin e rrugëve Passarella dhe Paolo VI. Kamioni i tonazhit të rëndë mori përpara 42-vjeçaren gjatë kryerjes së një kthese djathtas. E bija e së ndjerës shpëtoi pa lëndime pasi ndodhej disa metra më përpara dhe kishte arritur të kalonte rrugicën, por u bë dëshmitare e ngjarjes. Ekipet e emergjencës përdorën një vinç për të ngritur mjetin dhe për të nxjerrë trupin e pajetë.

Ngjarja ka tronditur komunitetin lokal dhe ka rikthyer në vëmendjen e mediave italiane çështjen e sigurisë së mjeteve të rënda në zonat urbane. Sipas raportimeve, kamioni ishte një model më i vjetër i pajisur me pasqyra shtesë, por pa sisteme moderne të detektimit të këndeve të vdekura.

Deklarata nga vendngjarja:

— “Po i shoqëroja fëmijët e mi në shkollë kur pashë shumë nëna që vrapuan drejt fundit të rrugës. Kur mbërritëm, pamë tragjedinë. Fatmirësisht, vajza ishte pak më përpara nënës dhe e kishte kaluar rrugicën.” — Dëshmitare në vendngjarje