Presidenti i Ukrainës, Volodymyr Zelensky, u takua sot me homologun e tij serb, Aleksandar Vuçiç, gjatë punimeve të samitit të parë të “Tetëshes së Karpateve” të mbajtur në Ukrainën perëndimore. Permes një deklarate në platformën X, kreu i shtetit ukrainas vlerësoi pjesëmarrjen e Serbisë në këtë strukturë të re bashkëpunimi, duke theksuar se fokusi kryesor mbetet zhvillimi i mundësive ekonomike dhe i sigurisë për vendet e rajonit.

Të dy udhëheqësit shqyrtuan ecurinë e marrëveshjeve dypalëshe të arritura gjatë vizitës zyrtare të Zelensky-t në Beograd në fillim të muajit gusht. Gjithashtu, bisedimet u fokusuan te proceset e integrimit evropian të të dyja vendeve, situata e sigurisë përballe sulmeve ruse, si dhe dërgimi i ndihmave humanitare nga Serbia drejt Ukrainës.

Pjesë e këtij samiti është edhe Forumi i parë i Biznesit të Karpateve. Nisma e re e nisur nga Kievi bashkon tetë shtete të Evropës Qendrore dhe Lindore — Rumaninë, Serbinë, Poloninë, Sllovakinë, Çekinë, Austrinë, Hungarinë dhe Bashkimin Evropian — me qëllim fuqizimin e tregtisë, korridoreve të transportit dhe bashkëpunimit të sigurisë.

Deklaratat kryesore:

— “Është e rëndësishme ta zhvillojmë këtë format të ri takimesh në mënyrë që çdo vend në rajon të gjejë mundësitë ekonomike dhe të sigurisë që i nevojiten. Po bëjmë gjithçka që mundemi për ta arritur këtë dhe sot, së bashku me liderët e tjerë, do të marr pjesë edhe në Forumin e parë të Biznesit të Karpateve.” — Volodymyr Zelensky

— “Diskutuam në detaje për integrimin evropian të Ukrainës dhe Serbisë, si dhe për situatën lidhur me sulmet ruse. Do ta vazhdojmë dialogun tonë dypalësh.” — Volodymyr Zelensky

— “Ne respektojmë integritetin territorial të partnerëve tanë dhe të drejtën ndërkombëtare. Sa i përket Kosovës, qëndrimi ynë mbetet i pandryshuar. Jemi mirënjohës ndaj Serbisë për respektimin e integritetit territorial të Ukrainës, përfshirë Krimenë.” — Volodymyr Zelensky (përsëritur nga vizita e tij në Beograd)