Konferenca kombëtare e prodhimit të përparuar që u mbajt më 16 e 17 shtator në Pekin, përcaktoi drejtime të rëndësishme lidhur me prodhimin, duke theksuar se është zhvilluar pandërprerë aftësia inovative, konkurrueshmëria dhe fuqia e përgjithshme, duke hedhur hapa të mëdhenj drejt shndërrimit të Kinës në një fuqi prodhuese.

Presidenti Xi Jinping, duke iu drejtuar kësaj konference tha se duhet të ndiqet drejtimi i zhvillimit inteligjent, të gjelbër e të integruar të prodhimit dhe të përshpejtohet ndërtimi i sistemit modern industrial me prodhimin e përparuar si shtyllë, për të mbështetur nxitjen e modernizimit kinez.

Kryeministri kinez Li Qiang u shpreh në këtë konferencë se duhet të rriten pandërprerë aftësia inovative, konkurrueshmëria dhe fuqia e përgjithshme e prodhimit të përparuar, të bëhen përpjekje për të arritur përparime thelbësore në teknologjinë kyçe duke forcuar shndërrimin e arritjeve tekniko-shkencore në përdorim konkret, të përshpejtohet zgjerimi i sektorëve në zhvillim dhe të promovohet ngritja e nivelit të sektorëve tradicionalë, të zhvillohet fushata "AI+Prodhim" dhe të forcohet mbështetja për transformimin digjital e inteligjent të ndërmarrjeve.

Gjithashtu, është e nevojshme që të nxitet integrimi i prodhimit të përparuar me sektorin modern të shërbimeve, të hartohet politika e mbështetjes sektoriale dhe të krijohet një mjedis i mirë zhvillimi, për të rritur pandërprerë energjinë dhe gjallërinë e prodhimit të përparuar.