Kryeministri Edi Rama, i shoqëruar nga Ministrja e Ekonomisë dhe Inovacionit, Delina Ibrahimaj, si dhe Ministri i Financave, Petrit Malaj, zhvilloi një takim me përfaqësues të supermarketeve dhe furnitorëve kryesorë në vend. Takimi u fokusua në prezantimin e platformës së re digjitale “Pasqyra e Çmimeve”, e cila synon rritjen e transparencës dhe krahasueshmërisë së çmimeve për konsumatorët.

Ministri Petrit Malaj sqaroi se iniciativa kërkon të analizojë marzhet e fitimit në të gjithë zinxhirin e tregtimit, nga importi apo prodhimi deri te konsumatori final, me qëllim identifikimin e rasteve abuzive dhe ndërhyrjen e mundshme përmes politikave fiskale.

Nga ana e tij, Rama u kërkoi sipërmarrësve angazhim konkret për dorëzimin e të dhënave, barkodeve dhe adresave të pikave të shitjes, duke i paralajmëruar se mbifitimet e nivelit agresiv rëndojnë mbi qytetarët dhe mund të sjellin masa reaguese.

Detajet kryesore të platformës "Pasqyra e Çmimeve":

Pjesëmarrja pilot: Krijimi i një rrjeti pikash shitjeje nga aktorët e tregut për të nisur transmetimin e të dhënave reale të çmimeve përfshirë TVSH-në.

Standardizimi: Dorëzimi i listës së produkteve me barkod dhe njësi matëse për të mundësuar krahasimin e drejtpërdrejtë nga konsumatorët.

Transparenca e stokut: Përcaktimi i standardeve për përditësimin e çmimeve dhe njoftimin e mungesës së produkteve në stok.

Deklaratat kryesore gjatë takimit:

— “Ne duam të kuptojmë marzhet që krijohen në zinxhirin e formimit të çmimit, që nga momenti i prodhimit deri te konsumatori i fundit, apo nga importi deri te konsumatori i fundit. Në radhë të parë duam të kuptojmë marzhet ku ne mund të ndërhyjmë me politikat tona fiskale, që të lehtësojmë sadopak barrën për konsumatorin. Nga ana tjetër duam të kuptojmë cilët janë sektorët që formojnë zinxhirin dhe nëse marzhet janë abuzuese.” — Petrit Malaj

— “Vetëm një aktor këtu i pranishëm u përgjigj, të tjerët u zhdukën. Besoj jeni të vetëdijshëm që po fitoni më shumë se sa e mban zakoni i mirë në një bashkësi si e jona, që nuk është as Kina e as Amerika e ku ky kapitalizmi agresiv ka filluar të bëhet shqetësues.” — “Të dorëzohet lista e produkteve që përputhen me kategoritë e kësaj faze, me bar cod, me njësi matëse. Kështu, produket të jenë të krahasueshme… Për qytetarin, ka ardhur koha të jetë shumë e thjeshtë, të shikojë, të krahasojë dhe të zgjedhë. Jo të jetë në errësirë dhe të përballet me çfarë i nxjerr rruga dhe të mos ketë një pasqyrë konkurrence.” — “Fitoni, por lini të tjerët të marrin frymë.” — Edi Rama