Organizata e Veteranëve të Luftës së Ushtrisë Çlirimtare të Kosovës (OVL-UÇK) ka thirrur për sot protestë gjithëpopullore në Prishtinë, si reagim ndaj aktgjykimit të shpallur nga Dhomat e Specializuara në Hagë ndaj katër ish-krerëve të UÇK-së. Protesta do të nisë në orën 12:00 në sheshin "Skënderbeu", ndërsa organizatorët kanë siguruar se ajo do të jetë paqësore.

Thirrja për protestë erdhi një ditë më parë nga Gazmend Syla i OVL-UÇK-së, i cili bëri të ditur se vendimi për mobilizim ishte marrë pas një takimi të Këshillit Drejtues të organizatës. "Protesta jonë që organizohet nesër është paqësore, jo e dhunshme, pa maska, me fytyrat tona. Kemi çka me tregu boll, fytyrat i kemi të ndershme, s’kemi nevojë fare të vendosim maska në protestë", deklaroi Syla.

OVL-UÇK e kundërshton ashpër aktgjykimin e shpallur ndaj Hashim Thaçit, Kadri Veselit, Rexhep Selimit dhe Jakup Krasniqit, duke e cilësuar atë si të padrejtë. Sipas Sylës, me këtë vendim është tentuar të krijohet një lloj baraspeshe artificiale mes luftës çlirimtare të UÇK-së dhe ngjarjeve të viteve 1998-1999. "Dje u dënua lufta jonë për çlirim dhe u provua të bëhet një balancë mes asaj që ka ndodhur në luftën tonë në vitet ’98-’99. UÇK-ja nuk ishte kurrë ndërmarrje kriminale, ishte rezistenca e popullit tonë përballë dëbimit, masakrave dhe e vetmja përgjigje e një kombi që ishte dënuar me zhdukje", tha ai.

Organizatat e dala nga lufta kanë paralajmëruar gjithashtu themelimin e një këshilli koordinues kombëtar dhe të një platforme përmes së cilës synojnë ta kundërshtojnë aktgjykimin deri në përfundimin e plotë të procesit të apelit. Sipas Sylës, kjo nismë synon të bashkojë institucionet e Kosovës, partitë parlamentare, shoqërinë civile, Shqipërinë, komunitetin shqiptar në Maqedoninë e Veriut dhe në Luginën e Preshevës, si dhe diasporën.