Charles Spencer rikthen në libër debatin e ashpër për funeralin e Dianës dhe bën një pretendim të rëndë për Mbretin Charles III. Pallati Buckingham ka ndërhyrë publikisht për ta kundërshtuar versionin e tij

Një përplasje e re publike ka shpërthyer mes Pallatit Buckingham dhe Kontit Charles Spencer, vëllait të Princeshës Diana, vetëm pak ditë përpara botimit të librit të tij të ri për motrën.

Në librin “Swan Song: Diana, My Sister”, Charles Spencer rikthehet te ditët dramatike pas vdekjes së Dianës në aksidentin automobilistik në Paris në vitin 1997 dhe ngre akuza të forta ndaj Mbretit Charles III, në atë kohë Princi i Uellsit. Libri pritet të botohet javën e ardhshme, ndërsa pjesë të tij po publikohen nga “Daily Mail” që citon sot noa.al.

Spencer rrëfen se pati një debat të ashpër me Charles-in gjatë përgatitjeve për funeralin e Dianës, veçanërisht për vendimin që princat William dhe Harry, atëherë vetëm 15 dhe 12 vjeç, të ecnin pas arkivolit të nënës së tyre.

Sipas pretendimit të Spencer-it, gjatë këtij debati Charles i kishte thënë se Diana do të harrohej “shumë shpejt”. Pallati Buckingham e ka kundërshtuar publikisht këtë version, në një reagim të pazakontë për një libër që ende nuk është botuar.

Në përgjigjen e tij, Pallati nuk hyri në një kundërshtim të hollësishëm të çdo pretendimi, por tha se dhimbja për humbjen e një motre mund të ndikojë në gjykim dhe në mënyrën se si kujtohen ngjarjet edhe shumë vite më vonë.

Por cilat janë disa nga akuzat më të forta në librin që po publikohet?

Vëllai i Dianës, Charles Spencer, shkruan se princi Charles kur vdiq princesha u shfaq i lumtur, a thua se kishte fituar lotarinë: "Mbreti Charles ‘dukej shumë i gëzuar — si një fitues i lotarisë’ pas vdekjes së Princeshës Diana, thotë vëllai i saj Charles Spencer.

Konti i 9-të Spencer tregon se mori një telefonatë nga Mbreti i ardhshëm Charles, i cili "dukej jashtëzakonisht i gëzuar".

“Reagimi i parë i princit ishte se si kjo ngjarje mund ta çlironte atë për t’u martuar me gruan që donte, në vend që të vlerësonte humbjen e një gruaje që nuk e donte”, thotë Spencer në libër.

Përplasja ka rikthyer në qendër të vëmendjes një nga periudhat më të dhimbshme të historisë së familjes mbretërore britanike dhe marrëdhëniet e tensionuara që pasuan vdekjen e Princeshës Diana.

Libri i Spencer-it trajton jo vetëm marrëdhënien e Dianës me familjen mbretërore, por edhe vendimet e marra në ditët pas vdekjes së saj dhe mënyrën se si u organizua funerali.

Ndërkohë që debati për Dianën pushtonte mediat britanike, Mbreti Charles III vijonte agjendën e tij zyrtare në Skoci. Më 17 shtator, ai priti në Dumfries House drejtues të kompanive dhe laboratorëve më të mëdhenj të Inteligjencës Artificiale, mes tyre Nvidia, Google DeepMind, OpenAI dhe Anthropic.

Kështu, ndërsa Mbreti përpiqej të përqendronte vëmendjen te sfidat e së ardhmes, libri i ri i vëllait të Dianës riktheu fuqishëm një nga kapitujt më të debatueshëm të së shkuarës së familjes mbretërore.