Gjatë fjalës së tij në seancën plenare, Kryeministri Edi Rama ka reaguar ndaj pretendimeve për shkeljen e afateve ligjore lidhur me projektligjin për pagat e magjistratëve, duke theksuar se asnjë pushtet tjetër nuk mund t’i imponojë afate apo vendimmarrje parlamentit.

Rama nënvizoi se respektimi i vendimeve të Gjykatës Kushtetuese mbetet parim, por sqaroi se sovraniteti i ligjvënies i takon vetëm Kuvendit të Shqipërisë.

Fjala e plotë e Kryeministrit Edi Rama:

— “Dhe kjo tjetra: ‘Respekto vendimin e Gjykatës Kushtetuese’. Respekto vendimin e Gjykatës? Patjetër, patjetër! Por ama, kurrë një Gjykatë Kushtetuese nuk i thotë dot një ligjvënësi: ‘Çoje ti dorën kështu, se e vendosa unë’. Dhe fatmirësisht, në këtë rast nuk e ka thënë. Ka lënë diskrecion të plotë. Për sa i përket shkeljes së afatit, nuk i vihen Kuvendit afate. Është një tjetër nonsens. Nuk mund t’i thotë askush Kuvendit, përveçse vetë anëtarët e tij, se kur do të mblidhet dhe se për çfarë do të mblidhet. Këtu bëhen katër orë debate për rendin e ditës. Si del një pushtet tjetër atje dhe thotë: ‘Do të mblidheni ju deri në datën 31’? Se po nuk u mblodhët deri në datën 31, në datën 1 ne do të mësyjmë dyert e Thesarit. Si është kjo?”