Qytetarët janë mbledhur sërish në bulevard në ditën e 110-të të protestës së tyre, duke kërkuar largimin e Kryeministrit Edi Rama dhe ndryshimin e të gjithë klasës politike. Mbledhja e protestuesve nisi fillimisht në Sheshin "Skënderbej" dhe më pas vijoi me marshimin drejt godinës së Kryeministrisë, ku pjesëmarrësit konfirmuan se nuk do të tërhiqen nga qëndresa e tyre deri në realizimin e kërkesave.

Tubimi i mbrëmjes vijon pas tensioneve të shënuara gjatë orëve të para të ditës përpara Kuvendit, ku pati përplasje me forcave të rendit. Situata u përshkallëzua kur protestuesit hoqën gardhin metalik të vendosur pranë Ministrisë së Mbrojtjes, veprim që solli ndërhyrjen e policisë dhe shoqërimin e disa personave, mes të cilëve edhe Dritan Goxhaj.

Përgjatë marshimit, protestuesit kanë brohoritur në kor thirrjet e tyre kryesore:

— “Arrestoni Ramën!” — “O Ergys o legen prite Ramën se po vjen!” — “Edi Rama frikacak!” — “Dorëheqje, ju erdhi fundi!” — “Policia e krimit!” — “Edi Rama jep dorëheqjen!” — “Edi Rama në burg!” — “O Erion o legen prite Ramën se po vjen!” — “Shqipëria e shqiptarëve, vdekje tradhtarëve!” — “Pa rini nuk ka Shqipëri!” — “Poshtë patronazhistët!” — “Shqipëria kërkon revolucion!”