Prokuroria e Posaçme Kundër Korrupsionit dhe Krimit të Organizuar (SPAK) ka nisur zyrtarisht një hetim lidhur me mosekzekutimin e pagave të magjistratëve për muajin gusht 2026. Në kuadër të këtij procedimi penal, hetuesit kanë ushtruar kontroll dhe kanë sekuestruar dokumentacionin përkatës në ambientet e Ministrisë së Financave.

Hetimi i organit të akuzës nisi pas një kallëzimi penal të depozituar nga vetë gjyqtarët dhe prokurorët, të cilët kërkojnë zbardhjen e rrethanave dhe përcaktimin e përgjegjësisë ligjore për moskalimin e pagave të tyre. Mes personave të faturuar në këtë kallëzim është edhe ministri i Financave, Petrit Malaj.

Sipas kallëzimit të magjistratëve, bllokimi i pagave nuk përbën një rast të izoluar, por prek një numër të konsiderueshëm gjyqtarësh dhe prokurorësh në të gjithë vendin. Përmes këtij hapi ligjor, i kërkohet SPAK-ut të identifikojë zyrtarët përgjegjës që kanë marrë, transmetuar apo zbatuar vendimmarrjen që solli mosekzekutimin e pagave, si dhe të përcaktojë konsumimim e mundshëm të veprave penale nga veprimet apo mosveprimet e tyre konkrete.