Sot u mbajt seanca për Bledar Bakajn, dajën e deputetes së Partisë Socialiste, Zegjine Çaushi, ku u vendos masa e sigurisë “Arrest me burg”. 52-vjeçari theu urdhrin e mbrojtjes dhe shkoi në banesën e Merita Grëmajt, ku plagosi me drapër babain e saj.

Merita Gremaj, në një lidhje të drejtpërdrejtë për emisionin “Shqipëria Live” përballë gazetarëve Sidorela Gjoni, Nexhi Beqiraj dhe Eris Dhamo, sqaroi të vërtetën e fotos së postuar nga deputetja Zegjine Çaushi, ku kjo e fundit pretendoi se daja i saj do të martohej me 34-vjeçaren. Gremaj e hodhi poshtë këtë deklaratë, duke thënë se nuk do të martohej kurrë me të.

Biseda:

— A do të martoheshit, cila është e vërteta? — Unë me atë, kurrën e kurrës.

— Kur është bërë foto? — Kur kemi ikur në Fier me ble rroba. Si mund të merrem me një njeri që më dhunon, kërcënon, më keqtrajton.

— Kush t’i ka dhuruar? — Më ka dhënë vajza e Nazmies. Foto është bërë se më kërcënonte.

— I ke thënë deputetes se do martohesh? — Jo, unë e kam nxjerrë jashtë. Donte Bledari të më fuste në punë dhe ajo thoshte në Roskovec.

— Pse nuk e keni denoncuar, të kërcënonte dhe nuk e ke denoncuar? — Se thoshte ti po tregove do të të heq një këmbë dhe krah, do të bëj të vuash, e ka thënë edhe në komisariat.

— Kur është bërë fotografia? — Në muajin qershor.

— Të këtij viti? — Po.

— Kur ka nisur dhuna për herë të parë? — Ka qenë e vazhdueshme.

— Edhe në qershor? — Vetëm dy ditët e fundit e ndali dhunën se erdha në shtëpi për të kërkuar ndihmë, te familja ime.

— Si reaguan institucionet kur bëre denoncimin? — Më thanë ‘pse nuk erdhe më para?’. Po nuk kisha shanse.

— Cilat janë provat që ke? — Kam një telefon tjetër dhe ky akoma vazhdon me kërcënime edhe në shtëpinë time. Atje nuk kam mundur t’a regjistroj se nuk kisha telefon.

— Në polici çfarë provash ke dhënë? — Kam dhënë prova. Unë faktikisht si person nuk doja kontradikta, se gjërat më shumë agravoheshin.

— A të ka marrë deputetja në telefon? — Erdhi bashkë me babain e saj dhe solli vetëm rroba.

— Pas denoncimit? — Jo. S’kam kontakte, s’më ka marrë, asnjë takim.

— Po të afërmit e Bledarit? — Më kanë thënë të heq denoncimin se ka fëmijë, nuk mundem se jam e kërcënuar dhe e dhunuar. Po tani që babai im ndodhet në shtrat çfarë të bëj. Unë dhe nëna jemi si mos më keq.