Protesta e zhvilluar këtë të enjte përpara Ministrisë së Brendshme është përfshirë nga tensione të reja, pasi protestuesit kanë arritur të çajnë kordonin mbrojtës të vendosur nga forcat e rendit. Përmes veprimeve të dhunshme, tubuesit kanë shkulur një pjesë të gardhit metalik që rrethonte perimetrin e sigurisë pranë godinës zyrtare.

Përshkallëzimi i situatës ka sjellë ndërhyrjen e menjëhershme të efektivëve të policisë për të rivendosur rendin dhe për të parandaluar depërtimin e mëtejshëm të turmës. Kjo përplasje pason incidentet e mëparshme ku protestuesit qëlluan me vezë dhe letra higjienike në drejtim të policisë, veprime që çuan edhe në shoqërimin e një personi në komisarit.

Tubimi i qytetarëve, i cili pason protestat e paralajmëruara një ditë më parë, ka nisur rreth orës 10:00, në mënyrë të njëkohshme me nisjen e seancës plenare në Kuvendin e Shqipërisë. Forcat e rendit vijojnë të mbeten në vendngjarje për të monitoruar situatën.