Seanca e sotme parlamentare është shoqëruar me debate dhe ironi mes opozitës dhe maxhorancës. Deputeti i Lëvizjes Bashkë, Redi Muçi, nga foltorja e Kuvendit ka thumbuar deputetët e Partisë Socialiste lidhur me masat e marra për t’iu shmangur protestave jashtë godinës, si dhe ka bërë një koment ironizues ndaj pamjes së re të deputetes Zegjine Çaushi.

Në fjalën e tij, Muçi deklaroi se përballë protestave që vijojnë prej 110 ditësh, e vetmja zgjidhje mbetet dorëheqja e kryeministrit Edi Rama dhe kabinetit të tij. Ai urioi që ky të jetë sesioni më i shkurtër parlamentar, ndërsa u shpreh se deputetët e shumicës kishin thurur plane për t’ju shmangur vezëve të protestuesve, duke u mbyllur fjalën me një urim për "look-un e ri" të deputetes Çaushi.

Kjo deklaratë ka sjellë reagimin e menjëhershëm të nënkryetarit të Kuvendit, Niko Peleshi, i cili i tërohoqi vëmendjen deputetit Muçi për përdorimin e një gjuhe të papërshtatshme dhe seksiste. Nga ana tjetër, vetë deputetja Zegjine Çaushi ka reaguar nga vendi ndaj fjalës së Muçit, duke iu drejtuar me ton të ashpër: "Ulu mo ulu, se na hape barkun, psikopat!".