SUDAN – Të paktën 60 persona kanë humbur jetën pas shembjes së një miniere ari në një zonë të largët në veri të qytetit Al-Nuhud, në shtetin e Kordofanit Perëndimor në Sudan.

Sipas raportimeve, shumë persona të tjerë dyshohet se kanë mbetur të bllokuar nën rrënoja, ndërsa ekipet e kërkim-shpëtimit kanë vijuar punën gjatë gjithë natës.

Ngjarja ka ndodhur në minierën Al-Zara, ku kushtet e pasigurta të strukturave dhe mungesa e masave të përshtatshme të sigurisë e bëjnë aktivitetin minerar veçanërisht të rrezikshëm.

Deri më tani, nga rrënojat janë nxjerrë rreth 60 trupa, ndërsa autoritetet nuk kanë një shifër të saktë për numrin e personave që mund të jenë ende të bllokuar.

Nxjerrja e arit ka marrë një rëndësi të veçantë në Sudan që prej shpërthimit të luftës mes ushtrisë sudaneze dhe Forcave të Mbështetjes së Shpejtë (RSF) në prill të vitit 2023.

Konflikti dhe humbja e vendeve të punës kanë shtyrë një numër të madh njerëzish drejt nxjerrjes artizanale të arit, një sektor ku aksidentet dhe shembjet e galerive janë të shpeshta.

Lufta ka përkeqësuar më tej krizën ekonomike dhe humanitare në vend. Sipas vlerësimeve të Kombeve të Bashkuara, rreth 20 milionë persona në Sudan përballen me pasiguri akute ushqimore.

Operacionet e kërkim-shpëtimit vijojnë, ndërsa autoritetet pritet të japin më shumë informacion mbi viktimat dhe personat që mund të kenë mbetur nën rrënoja.