POLONI – Një dron i tipit Gerbera 2, i dyshuar si rus, është gjetur në Detin Baltik pranë brigjeve veriperëndimore të Polonisë. Sipas raportimeve, mjeti kishte në bord një kokë luftarake me eksploziv të fuqishëm dhe një detonator.

Droni u gjet të hënën dhe u nxor në breg në plazhin e Rusinovës, pranë Jarosławiec, ku autoritetet kanë nisur procedurat për ekzaminimin e tij.

Forcat polake po hetojnë ende se kur dhe nga ku është lëshuar droni, si dhe cili ka qenë misioni i tij.

Sipas vlerësimit fillestar të ushtrisë polake, skenari më i mundshëm është që droni të ketë ardhur nga ujërat ndërkombëtare dhe më pas të ketë përfunduar në ujërat territoriale të Polonisë.

Zbulimi i mjetit vjen në një periudhë tensionesh të shtuara mes Rusisë dhe vendeve evropiane. Autoritetet në Varshavë kanë paralajmëruar për shtim të aktivitetit ushtarak rus pranë kufijve të Polonisë.

Ditët e fundit janë raportuar gjithashtu incidente të tjera me dronë dhe mjete ushtarake në hapësirën ajrore të vendeve anëtare të NATO-s.

Autoritetet polake pritet të japin më shumë detaje pas përfundimit të ekzaminimeve teknike dhe hetimit mbi origjinën dhe qëllimin e dronit.