Në pranga ka rënë Erniel Canka, 47 vjeç. Në lokal u gjetën doza kanabisi dhe pajisje për lojëra fati, ndërsa ndaj djalit të tij nisi hetim pas sendeve të gjetura në banesë

Tiranë – Një lokal në rrugën “Thoma Koxhaj”, në Tiranë, është zbuluar si ambient që dyshohet se ishte përshtatur për shitjen e lëndëve narkotike dhe organizimin e lojërave të fatit.

Në pranga ka rënë pronari i lokalit, Erniel Canka, 47 vjeç, banues në Vaqarr.

Gjatë kontrollit në ambientet e lokalit u gjetën doza të dyshuara kanabisi, të ndara dhe të bëra gati për shitje, si edhe pajisje e sende që dyshohet se përdoreshin për zhvillimin e lojërave të fatit.

Pas kontrollit në lokal, hetuesit ushtruan kontroll edhe në banesën e 47-vjeçarit.

Aty u gjetën një radio, një palë pranga, një thikë dhe një sasi fishekësh, të cilat dyshohet se mbaheshin në mënyrë të paligjshme nga djali i tij, K. C., 22 vjeç.

Ndaj 22-vjeçarit ka nisur procedim penal në gjendje të lirë.

Lënda e dyshuar narkotike, pajisjet e lojërave të fatit dhe sendet e tjera të gjetura janë sekuestruar, ndërsa materialet i janë kaluar Prokurorisë për veprime të mëtejshme. /noa.al