Kryeministri i Kosovës, Albin Kurti, ka reaguar pas shpalljes së aktgjykimit ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.

Kurti e ka cilësuar vendimin si “padrejtësi të papranueshme” dhe ka kritikuar dënimet e dhëna ndaj katër ish-krerëve të UÇK-së.

“Shpallja fajtorë dhe dënimi kaq i rëndë për katër ish-krerë të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, është padrejtësi e papranueshme, ndëshkim i madh dhe i dëmshëm”, deklaroi Kurti.

Sipas kryeministrit, fakti që aktgjykimi është shpallur formalisht “në emër të popullit të Kosovës” nuk do të thotë se ai përfaqëson vullnetin e qytetarëve.

“Aktgjykimi mund të jetë shqiptuar formalisht në emër të popullit të Kosovës, por kjo formulë e zbrazët nuk duhet ngatërruar me vullnetin e popullit”, u shpreh ai.

Kurti tha se vendimi duhet të kundërshtohet në Gjykatën e Apelit dhe bëri thirrje që procesi të vijojë sa më shpejt.

“Ky aktgjykim patjetër duhet ndryshuar dhe korrigjuar në shkallën e Apelit, dhe atë sa më parë”, tha Kurti.

Ai shprehu solidaritet me familjet e ish-krerëve të UÇK-së dhe me bashkëluftëtarët e tyre.

Duke iu referuar historikut të akuzave ndaj UÇK-së, Kurti përmendi edhe pretendimet për të ashtuquajturën “Shtëpia e Verdhë”, si dhe zhvillimet që, sipas tij, lidhen me akuzat e ngritura në Këshillin e Evropës.

“Me akuzat në KiE nga deputeti rus dhe serb, nisi gjithçka më 15 prill 2008, por ne duhet të sigurohemi që asgjë nuk përfundoi sot”, deklaroi ai.

Kurti shtoi se aktgjykimi i shpallur sot, sipas tij, ka rrëzuar një prej pretendimeve më të rënda ndaj UÇK-së.

“Aktgjykimi i sotëm rrëzoi pretendimin më të rëndë, se UÇK-ja kishte kryer sulm të gjerë dhe sistematik kundër një popullsie civile”, përfundoi Kurti.