Ish-kryeministri i Kosovës dhe kreu i AAK-së, Ramush Haradinaj, ka reaguar pas vendimit të Gjykatës Speciale në Hagë ndaj ish-krerëve të Ushtrisë Çlirimtare të Kosovës, të cilët u dënuan në total me 81 vite burgim.

Përmes një videoje të publikuar në Facebook, Haradinaj e cilësoi vendimin e gjykatës si “të papranueshëm dhe të padrejtë”, ndërsa theksoi se beteja ligjore duhet të vijojë në shkallën e dytë të gjykimit.

“Shqiptarë, kudo që ndodheni, vendimi i sotëm i gjykatës është i papranueshëm dhe i padrejtë”, u shpreh Haradinaj.

Sipas tij, lufta e UÇK-së ishte një luftë çlirimtare dhe tashmë beteja duhet të vazhdojë përmes rrugës ligjore.

“UÇK-ja bëri luftë të drejtë çlirimtare. Beteja me drejtësinë duhet të vazhdojë dhe të fitohet në shkallën e dytë, jo në emrin tim, jo në emrin e popullit të Kosovës, këtë vendim dënues”, deklaroi ai.

Haradinaj iu drejtua gjithashtu qytetarëve të Kosovës me thirrje për qetësi, duke paralajmëruar se çdo akt dhune apo dëmtim i pronës do të ishte në dëm të vendit.

“Qytetarë të Kosovës, shqiptarë, Kosovën ta ruajmë”, tha ai.

“Për Kosovën dhamë jetë, është gjëja më e çmuar e kombit tonë. I ndihmojmë armiqtë nëse dëmtojmë pronën tonë dhe në çfarëdo mënyre tjetër”, përfundoi Haradinaj.