Lideri i Bashkimit Demokratik për Integrim (BDI), Ali Ahmeti, ka reaguar pas vendimit të Gjykatës Speciale në Hagë ndaj Hashim Thaçit, Jakup Krasniqit, Kadri Veselit dhe Rexhep Selimit.

Ahmeti e ka cilësuar vendimin si “të padrejtë dhe thellësisht zhgënjyes”, ndërsa ka bërë thirrje për maturi dhe unitet në Kosovë dhe te shqiptarët.

“Vendimi i sotëm ndaj Hashim Thaçit, Jakup Krasniqit, Kadri Veselit dhe Rexhep Selimit është një vendim që e konsideroj të padrejtë dhe thellësisht zhgënjyes”, shkroi Ahmeti në reagimin e tij.

Ai u bëri thirrje qytetarëve që të shmangin tensionet dhe përçarjet, duke theksuar se, sipas tij, nuk duhet lejuar që vendimi të përdoret për të njollosur luftën e UÇK-së.

“UÇK-ja lindi si përgjigje ndaj shtypjes dhe luftoi për lirinë e Kosovës”, deklaroi Ahmeti.

Duke iu referuar procesit gjyqësor në Hagë, Ahmeti përmendi edhe pretendimet e dikurshme për trafikim organesh, duke theksuar se ato nuk u përfshinë si akuza në këtë proces.

Ai gjithashtu tha se gjykata, sipas tij, i ka shpallur të pafajshëm të akuzuarit për krime kundër njerëzimit dhe ka konstatuar se UÇK-ja kishte si objektiv pavarësinë e Kosovës.

“Këto janë fakte që duhet të kujtohen sa herë që dikush përpiqet ta paraqesë UÇK-në si ndërmarrje kriminale”, shkroi lideri i BDI-së.

Ahmeti u shpreh gjithashtu se beteja juridike për katër ish-krerët e UÇK-së nuk përfundon me vendimin e shkallës së parë.

“Procesi nuk përfundon këtu. Besojmë se mbrojtja do ta vazhdojë betejën juridike në Gjykatën e Apelit, duke kundërshtuar gjetjet e shkallës së parë dhe duke kërkuar drejtësi deri në fund”, tha ai.

Në përmbyllje, Ahmeti e cilësoi luftën e UÇK-së si luftë për liri dhe tha se historia e Kosovës nuk mund të rishkruhet.

“Lufta e UÇK-së ishte luftë për liri. Historia e Kosovës nuk mund të rishkruhet dhe sakrifica e një populli të tërë nuk mund të vihet në bankën e të akuzuarve. Me besim në drejtësi, beteja vazhdon në apel”, përfundoi Ahmeti.