Trupi gjykues i Dhomave të Specializuara në Hagë ka rrëzuar akuzën për krime kundër njerëzimit që rëndonte mbi ish-krerët e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi. Vendimi u bë publik gjatë leximit të përmbledhjes së aktgjykimit, në një seancë të hapur për publikun.

Kryesuesi i trupit gjykues, Charles Smith, shpjegoi arsyetimin ligjor pas kësaj rrëzimi: "Trupi gjykues konstatoi se ZPS-ja nuk arriti të vërtetonte, përtej dyshimit të arsyeshëm, se ishte kryer një sulm i përhapur ose sistematik kundër një popullate civile."

Akuza e rrëzuar përfshinte pretendime të rënda, si përndjekje, burgosje dhe ndalim të paligjshëm, torturë, vrasje dhe zhdukje me forcë e personave. Sipas aktakuzës së ngritur nga Prokuroria e Specializuar, viktima të pretenduara të këtyre krimeve ishin persona të konsideruar si kundërshtarë të UÇK-së, duke përfshirë shqiptarë të Kosovës, serbë, romë, si dhe komunitete të tjera.

Gjatë gjithë procesit gjyqësor në Hagë, të katërt ish-drejtuesit kishin mohuar kategorikisht akuzat e ngritura ndaj tyre, duke u deklaruar të pafajshëm.