Pas më shumë se tre vitesh proces gjyqësor, Gjykata Speciale në Hagë pritet të shpallë sot, në orën 10:00, aktgjykimin ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi. Vendimi do të vijë nga Trupi Gjykues II, i përbërë nga tre gjyqtarë me të drejtë vote dhe një gjyqtar rezervë.

Në krye të trupit gjykues qëndron gjyqtari amerikan Charles L. Smith III, i cili ka një karrierë të gjatë në sistemin gjyqësor të Shteteve të Bashkuara, ku ka shërbyer për vite si gjyqtar në shtetin e Iowa-s. Përvojën e tij në drejtësinë ndërkombëtare e ka thelluar edhe si gjyqtar i EULEX-it në Kosovë, duke përfshirë shërbimin pranë Gjykatës Supreme të vendit. Aktualisht, Smith kryeson trupin gjykues që ka ndjekur çështjen ndaj katër ish-krerëve të UÇK-së në Dhomat e Specializuara.

Anëtar i këtij trupi është edhe gjyqtari gjerman Christoph Barthe, i cili vjen me një përvojë të konsiderueshme në drejtësinë penale dhe atë ndërkombëtare. Ai ka shërbyer si prokuror publik pranë Gjykatës Federale të Drejtësisë në Gjermani, duke u marrë ndër të tjera edhe me dosje të lidhura me krime lufte dhe gjenocid. Gjatë procesit ndaj ish-drejtuesve të UÇK-së, Barthe ka qenë pjesë e trupit që ka shqyrtuar drejtpërdrejt provat dhe dëshmitë e paraqitura.

I treti anëtar me të drejtë vote është gjyqtari zviceran Guénaël Mettraux, një emër i njohur në fushën e së drejtës penale ndërkombëtare. Karriera e tij përfshin përvojë si avokat mbrojtës dhe këshilltar pranë disa gjykatave ndërkombëtare, si dhe angazhim në struktura të drejtësisë ndërkombëtare. Aktualisht, Mettraux mban edhe titullin e profesorit të së drejtës penale ndërkombëtare.

Rolin e gjyqtarit rezervë e mban irlandezi Fergal Gaynor, i cili ka një përvojë të gjerë në fushën e drejtësisë ndërkombëtare, e ndërtuar edhe përmes angazhimit të tij pranë Tribunalit Penal Ndërkombëtar për Ruandën, si dhe atij për ish-Jugosllavinë. Në procesin aktual ndaj ish-krerëve të UÇK-së, Gaynor qëndron gati si gjyqtar zëvendësues i trupit gjykues.