Ish-presidenti amerikan Barack Obama ka ngritur zërin lidhur me rreziqet e mundshme të inteligjencës artificiale, duke deklaruar se ky teknologji "mund të bëhet i rrezikshëm nëse nuk e menaxhojmë siç duhet". Sipas New York Times, ai i ka bërë thirrje Partisë Demokratike të marrë përsipër formësimin e politikave dhe qeverisjes lidhur me këtë çështje.

Deklaratat e tij erdhën gjatë një aktiviteti privat për mbledhjen e fondeve, në një moment kur gjithnjë e më shumë ligjvënës amerikanë po kërkojnë vendosjen e rregullave më të rrepta për sistemet e inteligjencës artificiale. Kjo valë kërkesash ka ardhur pas paralajmërimeve alarmante nga dy studiues të Anthropic, të cilët kanë theksuar se përparimi i shpejtë i industrisë mbart rrezikun e zhdukjes së racës njerëzore.

"Kjo është diçka që po evoluon shumë shpejt në duar private, dhe nëse nuk e marrim nën kontroll, mendoj se mund të bëhet e rrezikshme," u shpreh ish-presidenti.

Sipas një transkripti të pjesshëm të deklaratave, siguruar nga zyra e Obamës dhe cituar nga NYT, ai ka inkurajuar gjithashtu Udhëheqësin e Pakicës në Dhomën e Përfaqësuesve, Hakeem Jeffries, që të drejtojë një debat publik mbi politikën e inteligjencës artificiale, në rast se demokratët rimarrin kontrollin e Dhomës gjatë zgjedhjeve të mesmandatit të 3 nëntorit. "Sapo të bëheni Kryetar i Dhomës së Përfaqësuesve, do t’u rekomandoja fuqimisht demokratëve të krijojnë një kornizë për një debat shumë publik," i ka thënë Obama Jeffries-it, sipas gazetës.

Ish-presidenti u ka bërë thirrje po ashtu kandidatëve të garës presidenciale të vitit 2028 që ta vendosin inteligjencën artificiale në qendër të axhendës së tyre politike, duke paraqitur plane të qarta për adresimin e shqetësimeve të lidhura si me sigurinë, ashtu edhe me pasojat ekonomike të kësaj teknologjie.